បន្ទាយមានជ័យ៖ ក្រុមហ៊ុនទី្រភាពគ្រុបរបស់ឧកញ៉ា ទ្រី ភាព បាននាំអំណាយរបស់សម្ដេចតេជោ ហ៊ុន សែន និងសម្ដេចកត្តិព្រឹទ្ធិបណ្ឌិតប៉ុនរានី ហ៊ុន សែន ផ្ដល់ជូនរដ្ឋបាលខេត្តបន្ទាយមានជ័យដើម្បីចែកជូនពលរដ្ឋដែលរងគ្រោះដោយទឹកជំនន់ក្នុងខេត្ត។

ខេត្តបន្ទាយមានជ័យ បាននិងកំពុងរងការជន់លិចយ៉ាងធ្ងន់ធ្ងរដោយសារជំនន់ទឹកភ្លៀង និងទឹកហូរធ្លាក់មកពីប្រទេសថៃ។ ទឹកជំនន់នេះ បានធ្វើឱ្យប៉ះពាល់ ៦ក្រុង-ស្រុក ស្មើ ៣៨ឃុំ-សង្កាត់ និងប៉ះពាល់ប្រជាជនប្រមាណ ១៨ ៧១៥គ្រួសារ និងជម្លៀសទៅទួលសុវត្ថិភាពប្រមាណ ១ ១៥០គ្រួសារ។

អំណាយរបស់សម្ដេចតេជោ និងសម្តេចកិត្តិព្រឹទ្ធបណ្ឌិត ដែលត្រូវផ្ដល់ជូនរដ្ឋបាលខេត្តបន្ទាយមានជ័យនៅថ្ងៃនេះរួមមាន មីជាង ២០,៣០០កេស និងថវិកា ១០០លានរៀល ដែលត្រូវប្រគល់ដល់ លោកទេសរដ្ឋមន្ត្រី គន់ គីម អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ នៅសាលាខេត្តបន្ទាយមានជ័យ។

ក្នុងឱកាសទទួលជំនួយ លោកទេសរដ្ឋមន្ត្រី គន់ គីម បានគូសរំលេចថា សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត តែងតែគិតគូរជាប់ជានិច្ចចំពោះការលំបាករបស់ប្រជាពលរដ្ឋ។ តាមរយៈជំនួយមី និងថវិកា ជាសក្ខីភាពពីទឹកចិត្តពោរពេញដោយមនោសញ្ចេតនា និងការគិតគូរយ៉ាងជ្រាលជ្រៅរបស់សម្តេចតេជោ និងសម្តេចកិត្តិព្រឹទ្ធបណ្ឌិតចំពោះសុខទុក្ខរបស់ប្រជាពលរដ្ឋកំពុងរងគ្រោះនៅក្នុងខេត្តបន្ទាយមានជ័យ។

អភិបាលខេត្តបន្ទាយមានជ័យ លោក អ៊ុ រាត្រី គោរពថ្លែងអំណរគុណយ៉ាងជ្រាលជ្រៅចំពោះសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ចំពោះទឹកចិត្តដ៏ថ្លៃថ្លាក្នុងការជួយដល់ប្រជាពលរដ្ឋកំពុងជួបការលំបាក។ លោកអភិបាលខេត្ត ក៏បានថ្លែងអំណរគុណលោកឧកញ៉ា ទ្រី ភាព និងលោកស្រី ឧកញ៉ា គៀន ស្រីនាង ចំពោះទឹកចិត្តមនុស្សធម៌ចូលរួមរំលែកការលំបាករបស់ប្រជាពលរដ្ឋរងគ្រោះ និងរំលែកការលំបាករបស់រាជរដ្ឋាភិបាលកម្ពុជាផងដែរ៕

កាលពីថ្ងៃទី២៦ ខែកញ្ញា កន្លងទៅក្នុងពេលដែលទឹកជំនន់ក្នុងខេត្តបន្ទាយមានជ័យចាប់ផ្ដើមជន់លិច សម្ដេចតេជោ និងសម្ដេចកត្តិព្រឹទ្ធបណ្ឌិតបានផ្ដល់ជូនខេត្តបន្ទាយមានជ័យនូវថ្នាំសង្កូវ និងស្បៀងអាហារមួយចំនួនដើម្បីចែកជូនពលរដ្ឋដែលរងគ្រោះផងដែរ៕